Meeqqat atuarfianni soraarummeerluni karakteerit
Meeqqat atuarfianni soraarummeerluni karakteerit Ilinniartitaanermut Aqutsisoqarfiup Karakterdatabase-ani saqqummiunneqartarput. Meeqqat atuarfianni soraarummeerluni karakteerit kisitsisaataasivimmi saqqummiunneqarnerinut siunertaavoq nalunaarsuutit tamanut pisariinnerusumik atorneqarsinnaalernissaat. Massakkullu ukiumiit ukiumut karakteerit aammalu assersuutigalugu atuarfiit akornanni karakteerit ineriartornerat ajornannginnerusumik sanilliunneqarsinnaalerput.
Nalunaarsuutit tunngaviusut
Meeqqat atuarfianni soraarummeerluni karakteerinut naatsorsuinermi Ilinniartitaanermut Aqutsisoqarfiup Karakterdatabase-ani nalunaarsuutit atorneqarput.
Karakterdatabase meeqqat atuarfianni ukiumi atuarfiusumi karakteerinik, inaarutaasumik misilitsinnermi karakteerinik taamatullu Majoriami imaluunniit Kalaallit Nunaanni højskolini efterskoliniluunniit piginnaanngorsarluni meeqqat atuarfianni soraarummeernermi misilitsissummik naammassinnissimasut karakteeriinik imaqarpoq.
Database atuartut soraarummeerluni misilitsinnissamut peqataasussaanngitsutut akuerisaasimasut nalunaarsuutaannik imaqanngilaq. Amerlanertigut tamanna specialklassini atuartunut pisarpoq. Taamatuttaaq atuartut Danmarkimi efterskolini 10.klassersimasut nalunaarsorsimanngillat. Meeqqat atuarfianni aaqqissuusseqqinnerup eqqunneqarnerata kingorna atuartut soraarummeertut siulliit 2008-mi Atuarfitsialammi soraarummeerlutik misilitsipput. Aaqqissuusseqqinnerup siuliani eqqunneqarneratalu kingorna karakteerinut nalunaarsuutit sanilliunneqarsinnaanngillat, taamaattumik kisitsisitigut paasissutissani peqqussutip nutaap atuutilerneranit atuartut karakteerii kisimik ilanngunneqarput.
Periaaseq
2008-mut nalunaarsuutit atorneqartut peqqussummi siullermi nutaamilu atuartut soraarummeerlutik karakteeriinik imaqarput. Kisitsisitigut paasissutissani pequssummi nutaami atuartut kisimik ilanngunneqarput.
Karakteerit nalunaarsuutaat misissorneqarput, inuup-normui atorsinnaanngitsut peerneqarlutik. Atuartut Meeqqat atuarfianni naggataarlutik atuartunut aammalu FA-mi atuartunut klassip qaffasissusai malillugit agguaanneqarput. Klassit qaffasissusaanni kukkusumik nalunaarsorsimasut aaqqinneqarput. Marloriarluni nalunaarsorneqarsimasinnaaneq misissorneqarpoq, taamaasilluni inuup normui tamarmik immikkut fagimut ataatsimut, inaarutaasumik misilitsinnermut ataatsimut, klassip qaffasissusaanut ataatsimut aammalu ukiumut pineqartumut ataatsimut karakteeri ataaseq nalunaarsorneqarpoq. Atuartut napparsimallutik, agginngitsoorlutik il.il. soraarummeerluni misilitsinnermi peqataasimanngitsut peerneqarput, taamaasilluni nalunaarsuutini atuartut karakteerillit kisimik ilaatinneqarlutik. Taakkulu saniatigut aalajangerneqarpoq faginut toqqagassanut aammalu allamiut oqaasiisa pingajuannut karakteerit nalunaarsuutaat saqqummiunneqassanngitsut, nalunaarsukkat ikippallaarnerat kisitsisinilu paasissutissani sanilliunneqarsinnaannginnerat peqqutigalugu.
Naatsorsuineq
Soraarummeerluni misilitsinnerni karakteerit kisitsisitigut paasissutissaat agguaqatigiissillugit kisinneqarput aammalu kommunit, atuarfik, klassip qaffasissusaa, suiaassuseq ukiorlu malillugit naatsorsorneqarlutik. Taassuma saniatigut kommunit malillugit karakteerit agguaannerinut, karakteerilersuisarneq A-B, C-D, E aammalu Fx-F atorlugit, kisitsisitigut paasissutissiortoqarpoq.
Kisitsisini paasissutissani nalunaarsuutit sisamanit ikinnerusut saqqummiunneqanngillat.
Killiliineq erseqqissagassallu
Karakteerit agguaqatigiissinnerinut imaluunniit atuarfiit malillugit karakteerit agguaannerinut sanilliussinermi atuartut ikittunnguusinnaaneri eqqumaffigineqassaaq, kisitsisitigut paasissutissani nalunaarsuutit ikitsillugit inuit amerlassusaat apeqqutaalluinnartarmat ukiumiillu ukiumut nikerartitsisinnaalluni.